مع نفسي

أفكر مرارا وتكرارا مع نفسي ما هو مصير الناس في هذا الظلام الدامس لا يوجد أي نوع من الإضاءة لا يوجد أي خلفية عن أي شيء قد يبدو كلامي غير واضح للكثير لكنه واضح لكل شخص يعرف معنى الكلمة الجيدة ويفهم ما بين السطور . تتوارد أفكاري كلها في ثانية وتختفي في أقل من هذه الثانية . إنك تعلم أنك مخطىء في (ـــــ) لكن مع ذلك فأنت تستمر إذا أنت عنيد عنيد مع كل الناس وعنيد مع نفسك التي تأمرك بما تكرهه وفي نفس الوقت أنت تصنعه لأنك تشعر بالراحة عندما تقوم به . ضع بين القوسين الماضيين أي شيء تشعر بأنك مذمووم بسببه .

هل تعتقد أن كل الناس تكرهك إذا أنت مخطئ لأن هناك شخص يحبك ويخاف عليك لكنك لا تنظر أبدا إلا إلى الجزء الفارغ من الكوب وتحاول أن تتناسى الجزء الممتلئ وتغطيه بيدك .

من فلسفاتي الشخصية التي أعتقد أنها صحيحة . أني أنا الانسان الوحيد في هذا الزمن الذي أعرف كل شيء عن أي شيء لكن في الحقيقة هذه الفلسفة لا تعود علي فقط لا بل تعود على جميع الكائنات الحية التي خلقها الله سبحانه وتعالى . وهو أن كل شخص هو الصحيح الذي يعرف كل شيء لذلك أنا لا أسمعك وأنت لا تسمعني وكلنا نتحدث في وقت واحد .

يتم تربية الأبناء في هذا الزمان على طريقة وأسلوب خاطىء تماما وأبدأ هذا الإسلوب عندما يحاول الطفل الخروج فيقول له الأهل ( أوعى تخرج يا حبيبي لوحدك عشان القطة هتخربشك ) ولذلك يعيش حياته الطفولية كلها وهو خائف من القط لأنه كائن شرير يخربش فقط . ولما يكبر شوية , ( أوعى يا حبيبي تبعد عني لحسن الحرامي يخطفك ويقطع ايدك عشان تشحت ) وأيضا هذا كلام مائة بالمائة خطأ لأن هذا الحرامي لن يقوم بذلك ليضيف فقراء للمجتمع لأنه غير ناقص ثم هذا الحرامي لسة هيقطع ايد الطفل ما يسرق أسرع .

نتكلم ونشكر في أنفسنا ونعيش في مبارزات مع الشعوب الأخرى على ماتش كرة أو صفقة في الشركة أو مضاربة في الشارع و ننسى القضية التي مات فيها الكثير من إخواننا . ( فلسطيييين ) نحن ننسى إخواننا الفلسطنيين و نعيش حياتنا الزائفة التي سريعا ستزول ونموت ويقال بعدنا ما الذي فعله هذا الانسان في حياته وهو حي يدور في الدائرة الكبيرة بدون فاائدة .

كلام كبير يدور في رأسي الصغير الذي لا يتسع لمشاكل العالم بل هو يكفيني فقط لأفكر في دراستي التي سأفيد بها المجتمع بإذن الله .

ملحوووووووووووووووووظة كل مرة : أنا هقعد بعيد عن البلوج فترة من الزمن وهرجع إن شاء الله بموواضيع جامدة .

كان معكم محمد أبو حنيفة من قلب بيتنا اللي وراء النيل . جمب محطة البنزين .

شكرا يا ماما

دعوة حلوة منك وأديكي في السما يسمع ربي منك وينورلي أنا . حنان ملوش حدود أحسن انسانة في الوجود يا ماما . قدرتي تعدي بيا وتربيني وده انتصار وجي اقلك بابتسامة من قلبي شكرا يا ماما . وجه اليوم تبقي فخورة اني ابنك . ومرة سألتي نفسك لما بشوفك بفضل اراقبك من سكات وألقا نفسي بقول لنفسي بحب فيكي كتير حجات . شكرا يا ماما . ((أحمد مكي)).

شكرا يا ماما أقل كلمة ممكن اقلها للست اللي عمرها ما غفلت إلا لما انا انام هتوحشيني يا ماما , ماما انهردة ماشية من مصر وهتسبني مع جدتي وخلتي ولأول مرة في حياتي هقدي العيد من غيرها هي وبابا بس هي لازم ترجع السعودية لبابا عشان هو يا عيني قاعد لوحده أنا بجد يا جماعة زعلان وخايف ومتضايق لأن هي الوحيدة اللي كانت بتحسسني بالأمان ومفيش حد يقدر يعوضني عنه .

عموما انا في مرحلة عمرية اسمها الانفصال عن الأهل للإعتماد على النفس .

ومش هقول لقلبي غير كلمة واحدة : أنت رااااااااااااااااااااااااااااااااااااااااااااااااااااااااااااااااااااااااااااااااااااااااااجل

اسبوع زي الفل

يوم الخميس الهدوء الذي يسبق العاصفة

مصر هي أمي

مصر هي أمي نيلها هو دمي شمسها في سماري شكلها في ملمحي حتى لوني قمحي لون خيرك يا مصر , نازل من بيتنا ورايح على كليتي العزيزة على قلبي أوي , وبغني وسعيد والوطنية وخداني وجت اللحظة اللي أوقف فيها ميكروباص .

شيراتون-

لا-

شيراتون-

لا-

طب عاشر-

لا-

إن في مخلوق وراه كلية لا مفيش حد راضي يروح واتلطع اللطعة السودة دي ساعة والشعب كله مستني طب في ايه ؟ في ايه ؟ محدش بيرد , اتأخرت على معاد السيكشن وحاجة كووول آخر حاجة

, واضطر محمد حنفي شخصيا أن يتنازل ويركب تكسي .

وركبت التكسي وبقلوو هو في ايه محدش راضي يروح شيراتون ولا العاشر ؟؟

ورد عليا باستغراب شديد يدل انو بيسأل نفسه هو ده مخلوق معانا ولا من مكان تاني : أصل انهردة يا باشا مفروض الناس تاخد التذاكر الساعة 4 وقدام النادي الأهلي والناس مستنية من الصبح علشان تاخد دور .

_ طب وفيها ايه ؟؟

اصل في شاب عدا من شوية وقال لكل الناس اللي عايز تذاكر يجي ورايا لغاية الكبري وجرى الشعب وراء العربية والناس من كتر الزحمة كانت بتدوس على بعضها وضرب وحاجة حلوة خالص .

ملحووووظة : (قررت أنا السيد محمد حنفي عدم غناء أي اغنية وطنية وهرجع أكتب سلسلة ويلكم تو ايجبت )

ملحوظة 2 : (فاكرين البنت البمبا اللي كتبت عنها في الصدمة الأولى بتاعت الكلية ؟ هتشارك معايا وتكتب حجات في البلوج وأي حاجة هي تكتبها هكتب اخرها مع تحيات توتة هانم . )

وده أول موضوع ليها

يوم الخميس بليل يوم لذيذ

يوم لذيذ من أيامنا الذيذة اللي بنعشها ...كالعادة كلية ودراسة وظرف مش بقلك لذبذ .. ياخد لقب يوم الملل العالمي ( 12\11 |2009 )

رحت الكلية عادي جدا .... قربت الامتحانات ... مش مذاكرة وعادي برده ... واتحرق دمي عالصبح عادي برضة؟؟ , اصعب حاجة لما تلاقي نفسك مجبر على صحوبية ملهاش لزمة علشان فصلي كلو ولاد و بنت كمان لازم تبقى صحبتي بالدراع كدة ... عادي , طنشتني الصبح وبرضو عادي .

دخلت الفيزيا وطبعا لازم اركز عشان ابقى حلوة وماما تحبني وابقى بنوتة شطورة و مؤدبة ؟ خرجت منه على معمل أكثر لذاذة لمدة لذيذة بردة الراجل مش مخلي حد يعطس ولا أكنه ذل كفار , ولازم اسكت لا القى نفسي معيدة في المادة الرخمة دي . ( طبعا مفهوم نوع الإعادة ) !!!

خلاص لو لك عند الكلب حاجة قله يا دكتور .

ونصل إلى مسك الختام محاضرة الكمبيوتر . وإلاهي الراجل ده يصعب عليا .

ويأتي السبب في المعادلة الآتية :

مادة رخمة + شخصية هبلة = الاستهبااااااااااااااااااااااااااااااااااااااااااااااااااااااال

يا حرام عمال يتكلم ومفيش صرصار مركز معاه وطبعا وبالطبع وبالتأكيد أنا مش مزاكرة , والوقت مش راضي يعدي .

مع تحيات توتة هانم ....

يوم السبت يوم المتش المنتظر بين مصر والجزائر

راجع من الكلية وانا مبسوط ودخلت نمت وصحيت قبل المتش بشوية وجبت طبلة وقعدت اطبل وآخر انبساط واستنى انو يتعرض على دريم مفيش وفجأة يطلع يقلك اصل سعادة البيه منع عرضه على الفضائيات وقته هو عارف يعني بيجو على حجات هايفة ويطبلو سبحان الله . ماشش نتفرج على قناة النيل . طيب ما هو تعريف قناة النيل ؟ هي قناة مملة الصوت زي الزفت صوت الجمهور مغطي على صوت التعليق وحاجة فل الفل .

أوكي تغاضى تغاضى يللا فكك .

وإذ بمنتخبنا الغالي يحرز هدفين في مرمى الجزائر وانفجار الشعب في الشوارع ورقصهم والناس كلها فرحانة فاكرين انهم خلاص ضمنو الكاس .

العاصفة

ما هي العاصفة : هي رياح شديدة تضرب كل شيء أمامها .

أولا مصر لعبت متش فاصل مع الجزائر وهذا هو بداية العاصفة طب تيجي نرتب الأحداث :

1 وصول مشجعي الجزائر إلى السودان قبل المتش بيومين

2 شراء أسلحة بيضاء

3 تخويف السودان من اللي هيحصل لو مصر فازت فا قررو يساعدو الجزائر

4 المتش الفاصل

5 ظهور المشجعين بتوعنا في التلفزين

6 ظهور بعض الفنانين في المدرجات

7 فوز الجزائر

8 ضرب المصريين وحدف الطوب على الباصات

9 لجوء المصرين لبعض البيوت السودانية

10 استنجاد هيثم شاكر ومحمد فؤاد بعمرو أديب على الهواء

11 جرح وإصابة الكثير من اخواننا واخواتنا.

يا رب انصرهم وأحفظهم

لا حول ولا قوة إلا بالله حسبنا الله ونعم الوكيل في كل واحد فرق أو حاول يفرق بين الشعبين .

مع تحيات حنفي

ملحوووووووووووووووووظة ( قررت أن لا أكون وطني مرة اخرى عشان ده بيعمل حالة من النحس الجزئى )

يلا بلا باي

شكرا شكرا شكرا شكرا

كلمة واحدة ومش هقول غيرها شكرا . بس لازم افصصها : شكرا يا بابا , شكرا يا حبيبي , الراجل ده اعترف انو ابويا هو اللي رباني وهو اللي علمني وهو اللي صرف عليا دم قلبه يستحق اكتر من كلمة شكرا . يارب اسعده واديله على قد نيته .

حكايتي معاه لزيزة . الراجل ده استلمني من بيت جدي وجدتي خدني معاه السعودية دخلني المدرسة وعلمني احلى علم , وكمان هزأني كتير عشان يربيني وطبطب عليا برضو كتير .

أنا حاسس إني هعيط بكرة عشان هو مسافر بدري .

تخيل في يوم وليلة قلبك يمشي ويسيبك وتقعد وحيد لوحدك احساسك هيكون ايه .

لو واحد شارب حاجة هيرد ويقول جميل كالعادة بس انا هحس بفراغ وبكرة لما امي تمشي هحس بفراغ وفضاء واحساس بعيد عن الواقع , الواقع المرير اللي يعيش لازم يعيش بضمير وميخفش من اي حاجة بتطير . واللي مش عاجبه ياخد فيزا .

صوتي ياللي منتش فرحانة

تررررن ترررن - دكتور ممكن أرد على التلفون ؟

- أتفضل بس بسرعة عشان المحاضرة هتبدأ

- شكرا ......الو!

- أيوة يا حبي إزيك

- خلود حبيب هارتي ازيك يا باشا عامل ايه

- الحمد لله

- أنا رايح لكريم المقطم تيجي

- اه طبعا بس امتى

- يعني شوية

- خلاص انا معاك ان شاء الله بس اخلص المحاضرة وهاجي .......

دخلت لقيت القاعة فاضيااااا وحاضر 20 من 50 طالب ازاي متفهمش المهم اكتشفت ان كل واحد بيكتب نفسو في ورقة انو حضر وبعدين يروح للدكتور يقلو اصلي تعبان او اصلي مصدع أو اصل بابا مسافر والخ الخ الخ .

طبعا المحاضرة في قمة اللزازة وحاجة تفرح عبارة عن شوية كلام في الكمبيوتر اكتشفناه زمان بنفسنا ايام ما فتحنا الأجهزة بتاعتنا شيء عادي ماشي قشطة .

خلصت المحاضرة السعيدة وروحت لقيت خالد تحت بيتنا مستني رحت مطلعو وغيرت لبسي ونزلنا وحتى الآن مفيش مشاكل الدنيا هادئة والجو برد خفيف وبتمشى وانا بغني ومظئطط عشان اول مرة اخرج اتفسح من يوم ما دخلت الكلية .

تكس تكس

- المقطم

- لا

تكس

- المقطم

- لاااا

تكس

- المقطم

- فين

- شارع تسعة

- لع

تكس

- نعم في حاجة

- عايز اطلع المقطم

- وانا مالي

تكس

- وحياتك المقطم

- ماشي

- هييه تاخد كام

- 25

- نعم روح روح

تكس

- المقطم

- اه

- كام

- انت هتدفع كام

- عشرين

- اركب

وانطلقنا الى المقطم ونحن سعداء وزي ما قلت سابقا مظئططين

كررر كرررر كررررت كرررررررررررررررررر

- اببببا نسيت احط غاز

- نعم نعم يا روح قلبي مهي ناقصة

- معلش يا رجالة لازم أمون لحسن العربية هتقف بينا

- انا قلت من الأول اليوم ده لذيييذ لذييذ

نزلنا قدام محطة موبيل في شارع 9 وكلمنا كريم عشان يجلنا هناك

(خالد ) يبني هو كريم هيجي منين

(انا واعوذ بالله من كلمة أنا ) من الشارع ده

5 دقائق ولقينا كوكو ( عشان في ناس بتزعل من كوكو دي ) جه بالعربية البيضاء الناصعة البياض البي إم دبليو . ( طبعا هي مش بي إم أوي يعني هي حاجة تاني بس خلاص مشوها بي إم ) ركبنا وعلينا الساوند سيستم وشغل عالي اوي .

(كريم ) أزيكو يا شباب وحشني اوي

( أنا وخالد ) حبيبي ازيك والله وحشتنا يابني

( كريم ) عاملين ايه في الكلية

وقد أخرج كل شخص همومه وحياته مرة واحدة والحياة الجامعية الهادئة الجميلة .

(خالد ) انت رايح فين يا كوكو

- هنروح كارفور المعادي نقعد شوية وناكل

- طيب بس هتعرف تروح

- اه في طريق مختصر من ورا وحلو

_ ماشي ورينا يا فنان

ماشيين بالعربية على اسفلت ملوش صوت ومعليين الساوند على الآخر ومشيين على 140 وآخر حلاوة مرة وحدة نلاقي الأسفلت خلص مننا وبقينا بنمشي على زلت وحجارة وبيخبطو في العربية من تحت من كتر السرعة , راح كريم موقف العربية وقعد يرجع بضهرو بس مفيش فايدة مفيش أسفلت والدنيا ضلمااااااااااااا خالص .

طاااااخ

(كلنا ) ايه ده ! خبطنا ايه

وقفنا العربية ونزلنا نبص في ايه

لقينا كلب أسود مرمي قدام العربية

قربنا منه اكتر واكتر واكتر لقيناه بينزف دم جامد وجسمو قاعد يبخ دم بطريقة مش طبيعية

وفجأة

الكلب قام

( أنا ) لاااااااااا وجريت عالعربية أنا وهما

( كريم ) العربية مش بدوور

( خالد ) لامش ناقصة خالص

الكلب قعد يهوهو بصوت عالي ويعمل أصوات غريبة جدا وراح طالع فوق الكبوت

( كلنا ) يااااااااااااا رب ايه ده وصرخنا كلنا صرخة رعب وخوف وقلق

وكريم بيحاول يحاول يحاول مفيش فايدة وفجأة تظهر كلاب سودة كتير وتطلع كلها فوق العربية وتخبط عليها

بس

لما أقول يوم حلو نبقا ايه نصدق

العربية العربية العربية دارت هيييييييييييييييييييييه

جري كريم بسرعة بالعربية وداس فرامل مرة واحدة راحت الكلاب واقعة وبعدين رجع بضهرو ولف ورجع للطريق اللي جينا منه .

واخيرا لقينا الأسفلت وطلعنا داخلين غلط الشارع لافف بس مخدناش بالنا .

علينا الساوند تاني وهدينا وراح الخوف من قلبنا والحمد لله .

( خالد ) يا يبني انا اتشهد على روحي وقلت خلاص هنموت

( أنا ) لا انا عملت على روحي بقا

هههههههههههههههههههههههههههههههههه

وصلنا كارفور ودخلت بقلب جريء وانا نافخ صدري مش زي السعودية مااامنوووع لا يا عم انت في ايجبت وزي ما اتفقنا ويلكم تو ايجبت افري بادي .

ملحووووووظة : قررت عدم ركوب عربية مع حد في سني لازم اخرج مع حد كبير عشان ( أنا لثة ثوغير ) D;

واتعس الله مسائكم مع سيد أبو حنيفة .

بتفكر بإيه

ناس وناس وناس كل واحد من التلاتة دول بيفكر بطريقتو يعني مثلا في ناس بتفكر بعقلها وده الوضع الأغلب اليومين دول وناس بتفكر بجيبها ودول أسوء ناس في المجتمع اللي هما اتولدو للفلوس وعايشين على الفلوس وهيموتو على الفلوس وطبعا دي فئة كلنا بنكرها وناس بتفكر ب

ب

ب

بقلبها أيوة في ناس بتفكر بقلبها ودول بيبقا في منهم مشترك مع اللي بيفكرو بعقلهم زي الام بتفكر بعقلها عشان ولادها ينجحو وبتحب لولادها كل الخير بس يا ترى احنا هنتكلم عن مين احنا هنتكلم عن الفئة التالتة من النس اللي بتفكر بقلبها

دول بينقسمو اتنين برضو عشاق وهما اللي مش بيعرفو يفكرو الا بقلبهم ودول اللي بينتحرو لو حبيبهم سابهم وناس بتوازن بين العقل والقلب ودول في منهم كتير جدا .

حبيت أو حبيتي حبيبك سابك طب مفكرتش ليه هو سابك مهو ممكن عشان بيحب غيرك وممكن لأنك معرفتش تفهمو حبك لازم نتعلم من كل حاجة أنا وانت وهي لازم نعرف إن الحياة مش هتنتهي لو حد سابنا هنحب غيروه بس أوعة خلي بالكو متحبش حد قبل ما تنسى اللي قبلو لأن ممكن يكون عقلك بيكدب عليك ويقلك بحبها عشان ينسى .

بصو القرعة دي مجتش من فراغ اللي هقلكو عليه تفهموه كويس أوي أوي .

أنا أنا ااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا

ااااااااااااااااااااااااااااااااااااااااااااااااااااااا مش عارف تيء انا انا انا اااااااااااااااااا برضو مش عارف أقولها إظاهر إنها لسة شوية بس يوم ما هقولها هيكون يوم سعد الجميع .

هو في الواقع بالتحديد كدة بالسلاتو عالنبي أني أني قصدي أنا ب ب ببببب ببب بب مش راضية تطلع فعلا .

كلمة صعبة لا بجد صعبة جدا متطلعش في أي وقت أو لأي حد بس قبل الكلمة دي عشان الواحد ميقعش فيها ويندم لازم يكون قبلها كلمة أنا معجب بشخصية فلان وبعدين أنا ب بببببب بح بح استحالة لا كدة نافع ولا كدة نافع طب أعمل ايه ربنا معايا بجد .

وهقول كام جملة كدة بحبهم أوي

خليك شاب كول تفطر وتتعشى فول وخليك دايما لذيذ وطبعك لازم يغيظ بيها الناس تكون محتارة ونفض ومتشلش هم يلا بلا باي .

ملحووووووووووووظة : أنا بوعي الشباب فقط ولا يؤخذ كلامي على محمل الجد يعني أنا لسة معجب وبس .

مش هقول أنا تاني عشان في ناس محتجاني

يااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااه

أحلام وحلمت بيها واديها بتتحقق عرفت ناس فيها ولقيتهم في الحقيقة وسلمت عليهم كمان . ياما الواحد حلم بحد يكون جنبو يحس بقلبو ويضحي بهمه عشان صاحبه وأااادي الحلم بيتحقق . ياما حبيت ناس وياما كرهت ناس بس في الاخر كلهم بشر وأوعى تدقق . أنا انسان عشت في عالم كله خيال وفجأة صحيت ولقيت نفسي بتحقق من العالم الجديد اللي كله براغيت ومفيهوش مفيد وأدينا بنصدق . بفكر أسافر وأروح مكان بعيد على جزيرة لوحدي ومعايا حبيبتي واعيش براحتي قاعد نايم خارج محدش يسألني ليه ورحت فين وجيت منين . وقفت احلامي وبدأت اصحى وأفوق واحس بالمسؤولية تجاه أهلي واسلامي ووطني العربي . مش هطلع برة أنا هقعد جوة وهجدد في الأرض وهبني مستقبل وأطور في العلم وأغير في العالم . بس ! بس ! السؤال بيعيد نفسه ! هل هغير في العالم وللا العالم هو اللي هيغيرني معاه ؟

محدش عارف الإجابة لأن أنا نفسي مش عارف . هرد على السؤال رد مصري ! ياعم حضارة ايه ونهضة ايه ومستقبل مين يا عم روح لم قرشين أحسنلك وعيش وملكش دعوة في ناس غيرك هتعمل حضارة مش أنت يا مفعوص اللي هتغير في يوم وليلة .

وقد قررت أني هعيش بس هغير ومش هغير ! يعني ايه ؟ يعني هغير في نفسي وأحسن في نفسي . يقوم جيل كامل يقلدني وسعتها هكون غيرت في وطني ووطني هيغير في العالم ونعيش في حب وسلام .

لو عملت تعريف جديد لشخصيتي بدل اللي كان مكتوب في أول بوست أنا كتبته : أنا اسمي محمد حنفي عندي 18 سنة في الأكاديمية البحرية هندسة كمبيوتر . نفسي افتح شركة تنافس شركات الكمبيوتر العالمية ونفسي أشتغل واجيب فلوس بسرعة . أنا هعيش في فلة . وهبني مسجد وهعمل عربية خاصة بيا وهكون شخص مهم في عالم الكمبيوتر إن شاء الله وحط مليار خط تحت إن شاء الله .

((((((((((((((من السهل أن تصادق ألف شخص في سنة لكن من الصعب أن تحافظ على صديقك ألف سنة))))))))))))

الصدمة الأولى

يو يو يو هاي افري بادي أنا موهامد هانافي من aast انهردة كان فرست داي اروح فيه الكلية وبصراحة اتبصت آخر حاجة بس طبعا كانت انهردة الدعاوي بالهبل على اللي درسوني العلم بالعربي . اسوء حاجة انك بتدرس بالانجليزي كل حاجة وطبعا زي ما كلو عارف أنا دراستي كلها كانت عربي يعني ضايع ضايع طيب عملت ايه يا واد يا محمد ؟ أنا دخلت الجامعة على الساعة 8 وطلعت على الفصل (بالمناسبة كليتنا فصول مش مدرجات ) لقيت الفصل فاااضييي كله وإذ فجأة ألمح بطرف عيني وانا بلف راسي حاجة لونها بمبا رحت مدقق عيني لقيتها شابة قدي كدة ( فضلت تايه خمس دقائق لغاية ما خدت بالي إن احنا فصول مختلط مش زي السعودية ) فقلت أبدأ بالكلام

_سلام عليكم

_وعليكم السلام

(راح داخل شاب كمان وقعد جمبي )

فضلت قاعد قاعد ومفيش حد تاني والدنيا حر رحت قايم وشغلت التكيف بنفسيي اه والله بنفسي .

شوية وزهقت بجد رحت سائلهم هما الاتنين .

_ اسمك ايه

_ايمن

_وانتي اسمك ايه

_ هدير

_ وأنا محمد (بابتسامة واسعة المجال )

ثم وإذ فجأة يتدفق مصوورة من الذكوور كلهم في وقت واحد .

وأخيرا دخل علينا شاب كدة شكلو يدي 25 .

_ سلام عليكم أنا مستر حاتم جي بدل دكتورة مش عارف مين

المهم حضرت الحصة دي وخلانا نكتب عن نفسنا بالانجليزي (بالانجليزي خلي بالك وطبعا صاحبكو مييييييح )

طلعت واتعرفت على كام شاب كدة وقعدنا سوا في البريك مع خلودة حبيبي . دخلت بعد كدة فصل بس كبير في جواه فصلين كلهم ذكوووووووووووووووووووووووووووووووووووووووووووووووووووور فيه 4 اناث فقط . ياعم متركزش

دخل علينا رجل ضخم لا يعرف المستحيل ولابس بدلة راح قايل سلام عليك وكتب اسمو عالسبورة اللي بالطباشير أنا أول ما شفت هذا الدكتور اللبانة اتحشرت في زوري وفضلت أكح أكح لغاية ما الناس كلها بصت عليا واخيرا طلعت اللبانة وابتسمت ابتسامة تدل اني كويس ومتخافوش عليا .

قعد يشرحلنا مادة اسمها بالانجليزي اندستريال ريليشنز بس احسن حاجة الشرح بالعربي والكتابة بالانجليزي .

بعد ذلك دخلت فصل الميكانيكا وخدت كل اللي بكرهو ورجع الدكتور بيا للزمن القديم أيام ما كنت باخد فيزياء أيام أحسن أستاذ درسني فيزياء أستاذ أحمد قطب بس للاسف المصطلحات كانت بالانجليزي وصعبة ومختلفة .

وانتهى اليوم بهذا الشكل وقررت أحول لبزنس عشان اكتشفت أني في الباي باااي .

أشفكو الحلقة الجاية مع يوميات محمد أبو حنيفة .

ويلكم تو تو تو تو تو تو جامعة

حبيب هارتي لولولولولي يا فرحة يا فرحة يا فرحاااااا يا حلولي يا حلولي وانجحنا السنادي عقبال كل السنييين يا دي الخيبة اللي شيلانا ووخدانا بعيييد ادخل ادخل ادخل ياااا رجلللل وكن فأرا قصدي أسدا لا لا لا ..... لا لا لا (أن السمااء ممطرة وطريقك مسدووود مسدوود مسدوووود )

ياااااااااه وبعد عناء كبير أوي أوي أوي بصراحة وجنوني بسبب شهادة الثانوية العامة وبعد ذلك فرحتي بإتمامها وبعد هذا زعلي على التنسيق وبعد ذاك فرحتي بدخول الكلية . غدا غدا هو يوم تاريخي بالنسبة للبشرية فعبقري الغبرة سيدخل السيرك يووه قصدي الجامعة . الأكاديمية العربية لعلوم البحار وهي أكاديمية لزيزة أوي فيها كل حاجة كللللل حاجة الكويس الوحش الطيب والشرير . طيب أقرفكو بقا بالكام سؤال بتوع كل مرة . هل هتكون كويسة ؟ هل هتأقلم بسرعة فيها ؟ هل هتعرف على بشر جداد ؟ هل هعرف ابحلق في اللي جمبي ( احم أصل في وحدة صديقة لمامي هناك ومرقباني كويس أوي ) كل هذا وأكثر عند شرائك غسالة فول وطعمية أوتوماتيك .

لقد أصابني القلق والاضطراب الشديد والرهبة من هذا الشيء الجديد . أنا فاكر أول مرة ماما ودتني المدرسة قعدت أعيط أعيط وتشلني وتسكتني وتسبني أروح معيط اعاايط وجابولي المديرة وأنا أعيط . وبعد كدة قلت لبابا : بابا أنا نفسي أبات في المدرسة .

بعد كدة رحت ابتدائي قلتلهم عايز أروح يردو بنفس جميل لا متروحش .

واعدادي قلتلهم سأقتل المدرسين جميعا .

أما ثانوي بابا ماما أنا هنتحر.

يا ترى يا هل ترى بكرة هرجع أقلهم ايه تقريبا هتوسل لوزير التعليم يحط سنة رابعة ثانوي .

ناس كتير هتقلي ليه الخوف يا حبيبي ؟ هرد بكل حنية ( عشاااااااااااااااان أنا ضايع في الجبر والهندسة والفيزياء وبذكائي اللا متناهي دخلت هندسة ) شفتو فرحتي .

عموما تومورو هرجع وأحكلكو كللللل اللي حصل

لالالالا مش أنا

لقد اكتشفت في بلدي أشياء لم أكن أعرفها ااا انا بتكلم فصحة ليه بقا اعدل اعدل اللسان اشطة .. بس اديني اتعدلت.

اكتشف أن الشعب متدااول عنده كلمة عادي كل ما اروح في حتة اسمع عادي عملت ليه عادي رحت فين عادي كلت ايه عادي بتكلم صحبك دلوقتي عادي انت بتحب اه عادي وهكذا طيب خلينا نتكلم بقا في موضوع عادي انا في الفترة اللي فاتت غيرت من نفسي كتير بعد ما عشت في السعودية كل العمر ده جيت هنا لقيت حاجات ومبادئ متعودتش عليها قد مقدرش أقولها لأن كل اللي حوليا فيهم ده . يمكن حياتي ممشيتش زي ماكنت متخيلها بس كل حاجة بتحصل بعرف إنو خير من ربي يعني أنا كنت ناوي أدخل إعلام بس جالي اداب الاسماعيلية وكان قدامي إعلام خاص دخلت علوم حاسب وبعدين فكرت ولقيت نفسي أدخل هندسة كمبيوتر مع إني بحب الرسم ففكرت أدخل فنون جميلة بس أنا مش بعرف أرسم بإيدي برسم على الكمبيوتر بس .

كنت عايز ادخل msa بس لقيتها بعيدة فقررت أني أدخل miu متقبلتش وأخيرا هدخل الأكاديمية البحرية إن شاء الله يا ترى هعيش إزاي وأنا مصدوم كدة بالناس والشعب احنا شعبنا شعب نكته نكته! أه والله نكته , مش مصدق أنا اخليك تصدق : وقفت تكسي وبقلو:

- سيتي ستار يا أصطة

- أتفضل

(ركبت ومفيش ثانية لقيتو بيقف لزبون تاني وراح مركبو وركب 3 معاه كمان واسمع بقا الحوار كان كالأتي وعلى فكرة كل ده كان من واحد فيهم بس )

- استنى يا أصطة في 5 هيركبو كمان

- نعم يا بيه

- هههه بهظر أطلع

- شفت يا حمدي حصل ايه امبارح خالد كلمني وقلي ما تيجي قلتلو مش قادر قالي تعال بس عندي ليك مفاجأة قلتلو لا يا عم قالي اختي معايا وعايزة تشوفك قلتلو 10 دقائق وأكون عندك ههههههه رحت لقيت حتة سحلية معضمة قالتلي اصل أنا خارجة كدة من رمضان بس هتخن إن شاء الله . قلتلها لا لالا اخوكي قالي انك شبه نانسي ورجلك هيفا تؤ مش ممكن تكوني كدة . ( طبعا أنا بسمع وبضحك في نفسي )

وبعد شوية بدأ تاني : بس هي بنت حلا ومؤدبة ومحترمة وقصيرة ههه اصل أنا احبها قصيرة لو طويلة ممكن ترزعني قلم كل يوم من اللي هتشوفو مني ههههه .

بعدها بثانية : بس هي حلوة حلوة يعني . ( مش ملاحظين ان حتة صاحابو مش بيتكلمو ) وأخيرا وبعد نص ساعة حوار فتح واحد منهم بقو : شفت البت سامية اللي عندنا في الشركة عملت كزة وكزة وكزة وكزة ( جاب كل اللي عندو عليها من يوم ما دخلت شركتهم ) وديني لأطفشها هي فاكرة نفسها مين يعني كل ما اشوفها تروح قايلالي مستر حسين حاميني ومش هتقدر تعملي حاجة .

نزلت من التكس وأنا بقلب الكلام في دماغي وأحاول أفتكره وأقلب فيه واجيبه يمين وشمال عشان احاول اعرف هي شركة أيه أدوية ولا موبايلات ولا يمكن موبيليا . هع هع

اذا بعد كل هذا نستنتج أن شعبنا شعب نكتة وبيحكي كل اللي في قلبو حتى لو ده يجرح الجميع المهم هو يقول اللي في نفسو .

ملحوووووظة كل مرة : انتظرو المفاجأة في البوست الجي .

واخيرا اتجرأت أخيرا انا دلوقت هعلي صوتي علييييييك

صباح الفل لأحلى قراء انهردة العيد كل سنة وانتو طيبين عموما أنا كويس وبخير ومنتحرتش الحمد لله طيب نبدأ كلامنا بالعناوين

الكلية

اخباري وجوباتي

اعتراف بسيط

واخيرا خبر حلو

استقبل محمد حنفي وزي......... نو احنا بنقول الخبر بشكل مختلف بص بقا ياض انت وهو حقا كدة بالسلاتو عالنبي أنا ايه قبلوني في كلية اداب وعلوم انسانية الاسماعيلية . ظلمة ظلمة ظلمة أنا كنت عايز زراعة تؤ اصل الملف كان شفاف خالص وبيبين اللي تحتو يمكن شافو رغبات اللي بعدي وللا حاجة .

انا زي ما قلتلكو كويس الصدمة خفيفة مع ترك بعض الخدوش والجروح في مناطق حساسة أوي أوي ( بلاش قلة ادب أنا قصدي مخي ) وبعض الحزن والأسى على أصقائي الشطار الدحاحة عشان النتايج بتاعتهم زي الزفت .

أما عن الأعتراف فا انا بعد أن كتبت كل هذا الكم من التدوين فأنا اعترف أني لولا الله ثم د \ غادة عبد العال مؤلفة أنا عايزة أتجوز مكنتش كتبت حاجة هنا عشان انا بعتبرها معلمتي الأولى في عالم التدوين .

اخيرا الخبر الآخير وهو مرتبط بالأول أنا من انهردة يتقلي يا بشمهندس محمد عشان انا غالبا هروح الأكاديمية البحرية هنسة كمبيوتر

وياربت نشوف الكومنت على الصفحة نفسها عشان الكل يستفيد

ويلكم تو ايجبت 3

بقالي أكتر من شهر في مصر وبلف ودور على المكاتب وأروح مكتب التنسيق وبعد كدة قالولي النتيجة بعد اسبوع استنيت الإسبوع ده ومطلعتش النتيجة قالولي لا كمان اسبوع قلنا مااشي عديها مهو عقبال ما يشوفو الجرمء اللي جي من بلاد العالم ماشي. ويمر هذا الإسبوع عليا مرور السنة . وبعدين قالولي لا النتيجة الأربع اللي جي يعني دخلت في الأسبوع التالت وأدي انهردة الأربع و بببب مفيش حاجة .

طيب وصف الحالة النفسية اللي أنا فيها :

زهقان قرفان طهئان زعلان مضايق طلعان عيني وعين أمي وعين أبويا وعين اللي خلفوني وعين جاري وعين العيلة وعين البواب وعين السواق وعين بتاع الفول وعين اللي مشيين في الشارع وبعدين مخنوق هنفجر وأموت وأتحول إلى أشلاء متطايرة في الهواء مع قليل من البكاء لأني لسة متخانق مع حد عزيز عليا وبعدين شوية عصبية يتبعها رغبة في الجلوس بمفردي في البيت ومن ثم الرغبة في ضرب كل العيال اللي حوليا و حاسس اني هتحول لمستر هالك أو انكردبل واقتل كل البشر وأدخل الحمام لا مؤاخذة عشان أرجع . قرفتكو صح سوري .

المهم بعد كل الرغبات دي أنا قاعد قدام شاشة اللاب توب اللي مطلع عين الناس اللي كتبتهم فوق مع عين مهندسين الكمبيوتر بتوع مصر بكتبلكو الكلام اللي ملوش لزمة ده وفاتح موقع التنسيق وكل شوية أعمل ريفريش وياريت حاجة تحصل .

طيب أما بالنسبة لحالي فا أنا بدأت أتحول إلى كائن مصري مية في المية وبدأت أتقن لغة الحوار في الشارع والبيت وكل حتة .

أما بالنسبة للملل فا ده طلع مش في السعودية بس لا ده هنا كمان يمكن مش بشكل متوسع زي هناك بس موجووود.

ملحووظة : لو مكتبتش حاجة خلال الأربع أيام اللي جيا أعرفو إني ولعت في نفسي .

ويلكم تو ايجبت 2

أنا مشترك مع فريق مجددون (صناع الحياة مدينة نصر ) فا بننزل مشروع اسمو انسان لمكافحة التسرب في التعليم .
نزلت أنهردة معاهم بحث حالة لمنطقة من العشوائيات اللي فيها عشش .
أولا أن اتعلمت حجات كتيير من صناع انهردة يمكن من أهمها إني حسيت بالناس الفقراء وعرفت إن العشوائيات بتاعت الأفلام دي كدب وأي كلام ولا تمس بالواقع بأي صلة , اتعلمت أركب مواصلات في بلدي , اتعلمت اتكلم مع الناس وأقنعهم إزاي , وحجااااات تانية كتير .
نزلت من الساعة 11 الصبح رحت على الجمعية ومن هناك رحت مع التيم بتاعي بالمكروباص على حتة اسمها المساكن وبعدين من هناك رحنا جسر السويس عند حديقة اسمها بدر , دخلنا المنطقة المطلوبة في البحث ولفيناها عشة عشة طبعا ناس مش عايشة أنا قلت الحمد لله يا رب على نعمتك بصراحة حاجة صعبة جدا . جت في دماغي مقارنات كتير من ضمنها ناس عايشة عشان تصرف وناس بتصرف عشان تعيش ناس بتفطر فول وجبنة وناس بتفطر عيش مش مدعم ناس بتشرب كبتشينو وناس بتشرب مية ملوثة ناس بتركب عربية وناس اخرها تدفع أجرة مكروباص ناس بتلبس كل يوم وناس مش عارفة تدفا عند النوم ناس بتعيط عشان الحب وناس بتعيط من الذل ناس بتدرس في جامعة امريكية وناس اخرها محو أمية ناس بتتعب عشان القرش وناس بتصرف بالفيزا كرت ناس وناس وناس الحمد لله على كل حال وربنا يفك كربهم ويزيل حزنهم ويمحي دمعتهم امين امين امين .



ملحوووظة : رجعت الساعة 4 ونص البيت ومكنتش شايف قدامي وعلى فكرة أي حد عايز يجي مجددون يتفضل احنا ورا قويدر اللي في عباس العقاد .

ملحوظة كمان مش هكتب كدة تاني هرجع لإسلوبي القديم

ويلكم تو ايجبت 1

وصلت إلى بلدي الحبيب المليء بالزبيب والدقيق والذرة وإذ بأولاد خالتي مستنيني في مطار القاهرة العظمى روحت معاهم على مدينة نصر سيتي بيتنا يعني من الأخر وإديلو نووم يا معلم مقدرتش أستحمل لأن بقالي 3 أيام مبنمش عدل , صحيت وفتحت عنيا على نور الصبح الضارب في نني عنيا الإتنين وبدأت الطقوس المصرية الطبيعية وهي تجمع الأهل على طرابيزة وحدة على الفطار ويكون الفطار الطبيعي فووووول وبيييييض وجبنة بعد ما كنت بفطر تونة وسوسيس وسعات ساندوتش جبنة ولانشون .

الحياة هنا في مصر مختلفة تماما انت هنا بتعيش عشان انهردة وبس مبتبصش قدامك أما هناك برتب للحاجة قبلها بفترة .الدنيا في بلدنا الحبيبة زحمة جدا وده نظرا لزيادة عدد السكان كل 5 ثواني عيل .بس لازم أتعايش مع المحيط والجو اللي أتفرض عليا وخصوصا إني هعيش هنا على طول بقا وأهلي هيرجعو السعودية .عايز تمشي هنا بسرعة وتخلص أمورك تحط مع أي حاجة عايزها جنيه تلاتة بالكتير .بقالي في مصر شهر بدأت أعتمد فيه على نفسي بشكل كبير وبقيت أروح وأجي طبعا لسة محفظتش الشوارع ولا بقيت أعرف أركب ميكروباصات بس أهو ماشي حالي .

بس أكتر فرق حسيتو بين هنا وهناك هما الشباب أنا عرفت الشاب في مصر قليل لما يصلي ليه لأن أصلا بيسمع الأذان بالعافية والبنات بقا طالعينلي بموضة جديدة اللي هيا بدي مش عارف ايه تلبس كله محزق وملزق ومبين كل تفاصيل جسمها المملة وبعدين بسم الله ما شاء الله محجبة على ايه بقا. عموما مليش دعوة يولعو لحسن تكونو فاكرين إني متشدد لا لا لا أنا منفتح لأبعد الحدود .

مشيت في الشوارع وبعدين الحواري وكنت كل ما أعدي في حارة أعيط وأقول ليه كدة يا ربي ليه الناس دي عايشة كدا يا رب أرزقهم وأفتح عليهم من عندك.

رحت قدمت في التنسيق الحكومي بس النتيجة بعد اسبوعين وقدمت في الأكاديمية البحرية والله أعلم ايه اللي هيحصل بس اهم حاجة يا خوننا تدعولي من قلبكو.

وعلى رأي الأغنية الحياة حلوة بس نفهمها .

ليدي أند جينتل مان يللا بلا باي تابعو بقيت ويلكم تو ايجبت ...................................

إهداء إلى كل صديق ليا ووقف جنمبي

وأنا اسف لو في أي حد ناقص

يريت كل اللي يتفرج أو يقرأ حاجة يسيب كومنت لأن ده اللي بيشجعني أكتب أكتر

الطريق إلى ايجبت

من إنهردة بدأ بلوجي بالعمل قبل كدة كان كله تعارف على شخصيتي بس أما من إنهردة نبدأ الكلام الجد أنا رايح إنهردة بليل مصر بعد 15 سنة في المملكة العربية السعودية مكنتش بروح مصر إلا في الأجازة وبس أما المرادي أنا رايح أعيش فيها وأدخل جامعة فيها يا ترا هقدر أتأقلم بسرعة وخصوصا إني هقعد مع خالتي وجدتي أما ماما وبابا هيرجعو السعودية وهل هتقبل في كلية كويسة وللا هدخل خاص ونظرة المجتمع ليا كشخص كان عايش برة هتكون إزاي طب هعرف شوارعها وأمشي لوحدي وللا هفضل عالة على أهلي طب هدخل جامعة ايه وهتكون قريبة من البيت وللا محتاجة سفر كل حاجة عندي متلخبطة من إنهردة أنا داخل على مرحلة جديدة في عمري مش عارف نهايتها ايه وفين .


15 سنة 15 سنة عشت فيها أجمل أيام طفولتي وشبابي عرفت أحلا صحاب كريم وفيصل وخالد وعبد العزيز ومحمد يغمور ومينار وعمر هشام وعمر صمعان ووليد ومطيع وماجد . وعرفت فيهم أحلا ناس وزمايل فراس و أحمد و عبد القادر وعبد الله الغامدي وعبد الرحمن العمودي و.. و..و..و زمايلي في الفصول كلهم بجد مش عايز أنسى حد.

15 سنة عشت فيهم في أمان وسلام مشفتش فيهم عدوان نقلت في 4 بيوت كلهم كانو أحلا من بعد بيت في شارع الصحافة ده إستقبلني أول ما جيت وبيت في حي الصفا ده أتربيت فيه أغلب عمري وبيت في حي الورود ده عشت فيه فترة إعدادية وفترة المراهقة وبيت في الروضة عشت فيه أيام شبابي والثانوية العامة .

وإنهردة سبت كل ده ورايا وراجع بلدي مصر , راجع لأمي , هل هيكون حضنها دافي زي حضن أمي الحقيقية وللا هيكون حضنها كاتم لأنفاسي .
أنا كنت مستني اليوم ده من زمان زمان قوي بس قد ما كنت مستنيه قد ما أنا مرعوب منه .
أحاسيسي متضاربة مش عارف افرح عشان راجع لبلدي وأهلي وللا أعيط عشان سايب البلد اللي عشت واتعلمت وكلت من خيرها .
أفرح للقاء الأحباب وللا أعيط لفراق الأصحاب .

شريط أيامي بيعدي قدام عنيا دلوقتي بفتكر أول هدية بابا جبهالي وبفتكر أول قلم على خلقتي بابا برضو ادهولي وبفتكر أيام الطفولة البريئة وبفتكر صحابي في ابتدائي وبفتكر أول هدية جبتها لأمي في عيد الأم وبفتكر ولاد وبنات الجيران لما كنت بلعب معاهم وبفتكر أبويا وهو بيقلي أنزل صلي وبفتكر يوم ماعاقبني مرتين ورا بعض وبفتكر ازاي عرفت صحابي وبفتكر وبفتكر وبفتكر حجات كتييير مش عارف احطلكو ايه وللا ايه .

وشريط أحلامي برضو بيعدي من قدامي أكبر وأتعلم أحلا تعليم وأشتغل وأكون مصمم بارع في شغلي مشهور في مجتمعي وأتجوز أحلى بنت تعيشني في هدوء وسلام وأخلف أجمل وأهدا ولاد في العالم وأجيب بيت كبير وأبني مسجد صغير وأجيب عربية بي إم أخر موديل وأدخل ولادي افخم مدارس وأعيش حياة خالية من الهم والغم والنكد .
أحلام مبتخلصش كل يوم حلم جديد بيمحي اللي قبلو .

هل هعرف أعيش ؟؟؟؟؟

يريت أشوف كومنت على الموضوع كتير وإستنوني عشان أحكلكو عملت ايه أول ما وصلت مصر بس أدعولي أوصل بالسلامة وشكرا...

مرجان

كنت في بيتنا قدام الكمبيوتر عشان جبت كورس فوتوشوب فا قاعد أتعلم عليه وفجأة التلفون رن

تررررن ترررن ترررن

أنا : ألو

المتصل : سلام عليكم كيف حالك

أنا : الحمد لله إزيك يا باشا ( صحبي مينار )

مينار : تمام الحمد لله ايش بتسوي

أنا : قاعد فاضي

مينار : طب تطلع شاليهات

أنا : اه طبعا دي عايزة كلام بس شاليهات ايه

مينار : المرجان

أنا طبعا طبعا ( قلبي اتنفض لأني أخيرا لقيت خروجة حلوة )

.........................

قمت خدت شور على السريع ولبست ووضبت نفسي على الأخر صحابي عدو عليا كلهم وخدنا تكسي ورحنا

وقفنا تكسي بعد عناء ووقوف في الرطوبة نص ساعة مصري شبه أحمد رزق بالزبط نسخة شكله وصوته وحركاته

وإحنا في الطريق ومشغل أغاني تامر الجديدة فجأة تيجي أغنية مسخرة خلتنا كلنا نموت من الضحك

( أنا شارب سجارة بني حاسس إن دماغي بتكلني )

ههههههههه

قعد يتكلم معانا زي مهو معروف عن المصريين هنا إنهم اجتماعيين وبيحبو يتكلمو كتير. وصلنا الساعة 10 هناك قرفونا عقبال ما دخلونا فضلنا مستنيين صاحبنا مينار لأنو هو وأهله حاجزين وقاعدين من الصبح وبعد قرف وهبل الإجراءات دخلونا.

طيب تسمع بقا بسم الله عشان اللي قلبو ضعيف ميكملش قراءة

دخلنا يا حبيبي انت وهو وهي وشفنا اللي عمرنا ما شفناه في المملكة كلها , بنات لابسين من غير هدوم على رأي عادل امام كلهم بنطلونات ومسخرة وحاجة زي الفل والولاد قاعدين مع البنات عادي وبيتكلمو في حجات محترمة خالص ورقص وبتاع وكلام نعناع بلاش نوضح اكتر من كده وبعدين بقا ولاد كتير فاكرين نفسهم قمامير مع انهم زي الزفت ومنزلين البنطلون وكل حاجة باينة زي الصورة اللي فوق كده ويعكسو في البنت والبنت اللي ميعجبهاش الولد تقلو لا شوف غيري زي التليفون حاول مرة أخرى .

طبعا أنا مش متعود لأني كنت برة البوابة في مجتمع مغلق دخلت جوة بقيت في مجتمع اوبين زياده عن الزوم أمال لو رحت الصبح هشوف ايه أظن أظن بكيني دا أقل حاجة طبعا انا كنت بسمع عن ده بس عمري ما كنت أصدق أنو حقيقي لغاية ما شفته بعيني امبارح , لا وفي ناس تقولي إن ده اقل منتجع في كده دا في غيرو فيه دسكوهات .

قلت على البركة وبدأت زيي زي أي شاب بس بقا بطريقة تامر حسني في عمر وسلمى بلاش أوضح عشان أنتو عارفين بقا D:

وتم هذا اليوم على خير بعد ماعرفت الشباب السعودي على حقيقته أو بمعنى أصح الشابات.

ملحووووووظة ( أرجو من صحابي ميكتبوش حاجة من اللي شافوني عملتها نظرا إلى إن في قرايب ليا بيدخلو هنا ههههه )

وسي يو سووون إفري بدي في الطريق إلى إيجبت

بصموني بالعشرة

محروق متغاظ قرفان طلعان عيني مش طايق كل دي مصطلحات تدل على حالتي النفسية التي ستنفجر في شخص ما ,أشوف فيهم يوم.

القصة أيه يا معلم :بابا زي كل سنة راح يعمل الخروج والعودة للمملكة عشان نعرف نخرج ونرجع تاني ,وكانت المفجأة لازم ابنك يعمل بصمة اليد والعين عشان عنده أقامة لوحده.

أنا : امبوسيبل أنا أعمل بصمة يا بابا ليه شايفني خروف

بابا : لازم تروح يابني عشان تعرف تسافر برحتك لو مش عايز يبقا بلاش سفرأنا:ماشي يابابا ولازم ننزل الساعة كامبابا:الساعة 7 الصبح



وعندما ضرب منبهي في اليوم التالي الساعة 6وييييينص اتشطفت وزببط الزببيط ولبست ونزلت واليوم لطيف الوضع طبيعي بلا مشاكل بابا رايق العربية ماشية من غير صوت كل حاجة زي الفل.

وصلنا المركز تغيرت تعابير الوجوه بابا بقا مكشر وأنا بقيت بلطم قصدي بصوت .سجن جوانتنمو :ده افضل تعبير للمكان اللي بيخدو فيه بصمات الأجانب.قلنا طيب خلينا ندخل:

الظابط: يا سيد ( سيد دي كلمة دارجة في مجتمعهم معناها بالمصري كابتن كابتن ) تعال بعد العصر

بابا: ليه؟؟

الظابط :مافي مكان يللا من هنا

بابا :متزئش طيب

(أظن اليوم باين من أوله)

رحنا المركز التاني لقينا سجن أبوغريب

أسوار أسلاك شايكة وحاجة فله

دخلنا على العسكري اللي على الباب

بابا: لو سمحت البصمات منين

العسكري : أركن على جنب إلين يجيك الرقم

بابا :طيب

(واقفين في الحر الساعة 11 والشمس في جدة متتوصاش )

شويتين ولقينا أخ من بتوع الجوزات جه بعربيتو ولابس نضارة شمس

قلولنا روحو خدو منه رقم

خدنا رقم وبعدين سألناه نعمل ايه ؟ مردش نعمل ايه ؟ مردش , رحنا دخلين على ساحة تانية جنبها لما لقينا ناس واقفين هناك.

شوية وجه الأخ ده بعربيتو نحيتنا وراح نازل

أنا قلتلك تدخل محد قلك تدخل هنا (بزعيق بيقلي أنا وبابا , طب أنا معلش أما بابا راجل كبير يللا على خيرت الله) جيب الرقم وأطع برة الدور اللي بعد هذا.

طلعانا ومشينا على طول مستنناش

رحنا الفرع التالت ولقينا نفس اللي في الفرع الأول

(( عموما الوضع زيو زي مصر مفرقش كتير ))

تو تبي كونتينيو

وجبتها والحمد لله

وبعد عناء طوييييل استمر 12 سنة وبعد سهر وكد وتعب شديد وسهر لليالي لقد نجحت في الثانوية العامه ستوووب فلاش باك نرجع ورا شوية

ههههههه لا مفيش ورا انا هطلع قدام وبس إلى الجامعة إن شاء الله بس جامعة ايه جامعة ايه الله اعلم انا محتار ومش عارف حاجة
المهم أنا انهردة كان من أجمل ايام حياتي خرجت مع صحابي البحر وبعد مارجعت واحد من صحابي قلي افتح موقع الوزارة فتحتو وأحط رقم سجلي المدني وكانت المفجأة كالتالي:
الأسم :محمد أحمد .........
النسبة
النسبة

النسبة








النسبة : 93,39


أسمع ما شاء الله من كل واحد عشان نبقى حلوين

و بااااااايز D:

بتخلفونا ليييييييييييه ما تقومو تروحو

أنا زيي زي أي شاب كول الدادي والمامي بتوعه بيجبولو لبس بس لبس السفر عندي حاجة تاني خالص.

نزلت امبارح مكان كده في جدة بابي قاللي اسمو ايه ؟! اسمو ايه ؟! ااااااا اه ((وسط البلد)) وسط البلد في أي بلد بيبقا فيه زي ما حنا عارفين كل حاجة جزم ماشي هدوم ممكن أكل اوكي وعلى رأي المثل الهاي بتاع الناس الهاي (زي مافي أبوعشرة في أبو مية ) بصو من الآخر أنا نازل أجيب جزمااااااااااااااا احم كباية مية لوسمحت احم احم .

وصلنا لفين اه جزمة طبعا في ناس وخده الموضوع كول خالص لا طبعا أنا عندي مش كول . ياساتر دي كلمة الست الوالدة لما تكون نازلة تجبلي جزمة .

وصلنا وسط البلد منذ أو مذ ((مش فاكر أصل أنا لسة وخدها السنادي :)) الساعة السادسة مساءً

بابا : انزلو هنا عقبال ما مأركن العربية (ووقفنا على جنب الشارع عشان ينزلنا )

راح لازق فينا حتت واحد دزمة وأبن دزمة وقعد يضرب كلكس ويريته عادي ده معليه لغاية ما سورني وبقيت مدروخ .

نزلت من عربيتنا المتواضعة ورجعتلو وفتحت باب العربية الزبالة بتاعتو (بصراحة أنا كنت قرفان أمسكها يااي المهم ) ورحت بعزم ما فيا مزعق ورزعتو كلمتين من اللي قلبك يحبهم , بصصلي حتت بصه بتقول وراها كلام كتييير أنا شممو .

ويا حسرتاه رد عليا بالهندي . (: (:

( حالة من الإزبهلال يتبعها حالة من التردد لأن الأخ مفهمش ولا كلمة من اللي قلتها ولا أنا فهمت كلمة من اللي قالو بس في الغالب هو شتم بالهندي , إلا قلولي هو يعني ايه يا كاوال اظاهر معناها ... تيييييت ) مش بقلكو يوم الجزمة بيبقا يوم لذيذ خالص .

دخلت سوق الكورنيش أو بمعنا أصح مستعمرة الفلبينيون اللي أحتلو المنطقة دي من أيام سعد الدالي جنيه انت سعد إدالك كام .

خدنا الأول المركز كله بالمراكز اللي جنبه كعب داير استطلاع يعني وبعدها مرة تانية بس جري عشان أفتكر الجزم اللي شفتها هو انا مخي دفتر يعني وبعد كده خدناهم تالت مرة عشان أدور على الجزمة اللي أخترتها أول ما دخلت باب السوق في الأول خالص بس طلعت ب 600 ريال بعد ما قستها ومشيت بيها وحسيت اني مرتاح فيها .

وبعد 4 ساعات من اللف والدوران في المركز قررت سعادتي الدالي قصدي التالي : مجبش من المكان ده خالص (مش بقلكو يوم لذيذ)

رحنا على مركز تاني خالص كلاس وحلو وكبير وأقل زحاماً اسمو المحمل . مقعدش فيه كتير هما 3 ساعات فقط لا غير شفتو أنا طيب إزاي . وأخيرا وبعد عناء كبير أوي جبت جزمة على رأي واحد صحبي حوة حوة .

:)

ملحووووووووووووووظة (قررت السيدة ماما عدم شراء أي جزمة معايا تاني وقرر السيد بابا ميودنيش بعربيته أي محل جزم تاني )

عشان أنا سعد الدالي جنيه أنت سعد الدالك كاام؟

الجزء الأول :طريق طويل

الجزء الأول :طريق طويل

الفصل الأول :

الممرضة : ألف مبروك يا استاذ محمد جالك ولد , الحمد لله الحمد لله يارب أحمدك وأشكر فضلك , مشيت في طرقة المستشفى وأنا طاير من الفرحة ودخلت على مراتي , حمدالله على السلامة يا رانيا , ردت وهيا في عنيها دموع الفرح الله يسلمك يا حبيبي دخلت الممرضة وقالتلي هتسمو المولود ايه بس انا مخدتش بالي لأني كنت ملهوف على الولد والدموع ماليا عنيا عادت السؤال مرة تانية بس انا في عالم تاني قربت مني الممرضة استاذ استاذ وقالت ببرطمة هو كل واحد يخلف هنا يبقى متخلف دي حاجة تقرف , ردت عليها مراتي بشدة : بتقولي ايه؟ اااااااااا اااا ااا هتسمو المولود ايه , بصتلي مراتي هتسميه ايه يا حبيبي , وقفت شويه وبصيت في عين الولد......
كريم كريم هسميه كريم , بعديها بدقايق الباب خبط مين انا كريم اتفضل اتفضل , دخل كريم ومعاه مراتو اللي هي تبقا أخت مراتي الحامل في الرابع أصل هو أتجوز بعدي على طول , قال هو ومراتو في نفس واحد حمد لله على السلامة يا رانيا والف مبروك عليكوا سألني كريم ساميتوه ايه , قلتلوا وأنا فرحان سميتو كريم على اسمك. شويه والباب اتفتح بالجامد حفيدي حفيدي اشوف حفيدي حاضر يا ماما ودخل ورها بابا , قلتلوا مبروك يا حاج بقيت جد طبعا ماما مسكت الولد ومسبتوش طب خلي الحاج يشيلو شوية رد عليا بابا وقالي يابني انت لسة متعرفش أمك لغاية دلوقتي هتموت لا تعرف..... علي صوت ضحكنا في أوضة المستشفى ………

الفصل الثاني : قبلها ب9 سنين
انا اسمي محمد عندي 17 سنة اتولدت في مصر بابايا طلق مامتي وأنا عندي 3 سنين وقعدت في بيت جدي وخلاني وخالتي هما اللي ربوني لغاية ما ماما اتجوزت راجل تاني مصري بس عايش في السعودية عشان بيشتغل هناك راجل طيب أوي هو اللي رباني دايما بقولو يا بابا لأن هو الأب اللي وعيت عليه وبعدين الأبوة بالتربية مش بالخلفة .
انا دلوقتي في ثانوية عامة احلامي اني اكون مصمم بارع , عندي اتنين صحاب مليش غيرهم في الدنيا ومعنديش اخوات اسمهم كريم وفيصل , كريم مصري وفيصل سعودي . اتعرفت عليهم في المدرسة . أظن كدا تقريبا شرحتلكو موقفي في الحياة .

الفصل الثالث : مرحلة خامسة وستة ابتدائي

لا لا انا ارفض الطريقة الجديدة في تنظيم الفصول المرشد : مش بكيفك يا حبيبي يلا علا فصلك .
احنا النهاردة أول السنة والمدرسة قررت تغير فصول جميع الطلاب يعني هيلخبطونا بعد ما خدنا على بعض من سنة أولى .
دخلت فصلي الجديد بهدوء وإيدي في جيبي بتترعش يا ترى ايه اللي هيحصل مين الطلبة المشاغبين عشان ابعد عنهم رحت اعدت في الركن بس كان ورايا طالب واحد . قعدت أول يوم وتاني يوم أراقب الوضع وانا مش متحمس لغاية ما لقيت قدامي طالب هادي قاعد في نفسو حاولت أكلموا بس معرفتش لساني مش عارف يقول ايه قلتلو ممكن قلم أصل نسيت قلمي بصلي كدا وكنت مستني ردت فعل عنيفة بس أداني القلم بعد كدة بقينا نتكلم كتير سوا لغاية ما اتصاحبنا ودي بداية صحوبيتي مع فيصل عرفت بعد كدة ان باباه ممثل سعودي . خلصت السنة وانا وفيصل صحاب أوي , جت سنة ستة ابتدائي وبرضو انا وفيصل سمن على عسل ونسيت بقا حكاية الفصل الجديد والكلام دا كلو , وفيوم من الايام في الفسحة بتاعت المدرسة لقيت ولد مؤدب جدا بيلعب مع نفس الولاد اللي بلعب معاهم أتعرفنا على بعض كان اسمو كريم بقينا نلعب كل يوم مع بعض وبقينا صحاب بس داخل حدود المدرسة يعني لسة زمايل بس وخدين على بعض , جينا على أيام الامتحانات بتاعت الفصل الدراسي الأول بقا فيصل وكريم في لجنة وحدة وانا في لجنة لوحدي وكل يوم بعد الأمتحان كان فيصل بيراجع مع كريم الامتحان لأن كريم كان أشطر واحد في المدرسة , وفيوم من الايام وأنا وفيصل خرجين فيصل كان سرحان سألتو في ايه يابني من ساعت ما خرجنا وانت مابتنطاقش كلمة على بعضها رد عليا وهو بيفكر وباصص لفوق ايه رأيك في كريم قلتلو ولد كويس ومؤدب ومحترم ومفيهوش حاجة تتعايب قلي طب لو اتصاحبنا عليه عادي ؟ قلتلوا دي عايزة سؤال طبعا اه ………………

الفصل الرابع : المراهقة

احنا التلاتة مكانش لينا في قلت الأدب لا البنات ولا سجاير ولا معاكسة ولا أي حاجة من الحجات دي كل تفكيرنا كالآتي انا الكمبيوتر والتصميم وكريم الكمبيوتر وكرة الطايرة وفيصل الفن والمسرح
بس الحاجة الوحيدة اللي بنعملها اننا بنسمع أغاني , اما باقي الوقت فهو أوقات فراغ لأننا في مجتمع مغلق فا أي حتة نروحها يقولو ممنوع دخول الشباب كان حلمنا ان احنا ننزل مصر عشان نعيش حيتنا بعيدا عن الأنغلاق .

الفصل الخامس : قبل الفصل الأول
انا دلوقتي في الجامعة كلية إعلام وقدامي سنة واتخرج
اما فيصل فا دخل فنون مسرحية وكريم دخل طب أسنان .
طبعا الحياة دلوقتي غير قبل كدة أنا دلوقتي في مصر اللي مكنتش بروحها الا في اجازة الصيف يعني في بلدي وحاسس اني غريب بس مع الفترة اتعودت وبقت حاجة عادية , اه نسيت انا اتعرفت على ناس جديدة ومنهم وحدة بنت اسمها رانيا . رانيا معايا في الكلية وهي بنت مؤدبة جدا وعندها نفس ميولي . مامتها متوفية من زمان. قررت اني اعترفلها بحبي وطلبي لإديها ولما روحت أكلمها لقيت خدودها قلبو عنب قالتلي هحددلك معاد مع بابا عشان تزورونا انت وأهلك يومها البنت مصدقتش وأغم عليها من الفرحة .
بعدها بإسبوع تلفوني بيرن الساعة 6 الصبح وأنهاردة اجازة قلت فكك منو وكمل نوم التلفون مسكتش رديت بكل نرفزة مين الحمار اللي بيتصل السعادي لقيت صوت ضحكة بنت مش غريبة عليا قعدت عشان أجمع شوية وبعدين لقيتها بتقولي صباح الخير انت لسة نايم , قلت مين رانيا , قالتلي لا الحمار , أخ لا انا اسف اسف أصل مش متعود حد يكلمني الساعة 6 الصبح قالتلي صبح ايه يابني داحنا المغرب خلاص , اكتشفت اني نمت يوم كامل لأني كنت سهران طول الليل قدام التلفزيون بتابع أفلام رعب , الووو الووو محمد فينك , ايوة يا رانيا معلش هكلمك بعد شوية عشان أصلي كل اللي فاتني.
قمت أتوضيت وصليت كل الصلوات اللي راحت وبعد ما خلصت دعيت ربنا انو يجيبلي أخبار حلوة .
رفعت السماعة وحطيت الرقم وكل رقم بدوس عليه بسمع صوت قلبي , بيرن الوو أزيك يا طنط ممكن أكلم رانيا , لحظة وحدة , الوو , ايوة يا رانيا كنتي عايزة ايه , كنت عايزة أقولك بابا مستنيكو بكرة بعد صلاة العشاء وانتو معزومين عل العشا .


الفصل السادس : لحظة المواجهة
طبعا كل دا حصل من غير علم بابا و ماما هقولوهم ايه دلوقتي ,
روحت لماما عشان أقولها , خبط الباب لاقيتها بتزعق فتحت الباب بشويش لقيتها بتتكلم في التلفون ومتنرفزة على الأخر.
روحت لبابا لاقيتو قاعد في الصالون وفاتح نور هادئ وبيئرا كتاب أتسححبت وخبط الباب بشويش قالي تعالى يابني أئعد عايز أيه شكلك مخطوف كدا ليه قلتله مش جه بقا الوقت يا بابا قالي وقت ايه يابني انا سمعك , بصراحة يا بابا أنا عايز أخطب , رد بابا بكل سعادة في أنهي مسجد , قلتلو لا انا عايز أخطب وحدة معايا في الكلية , قالي طب مش لما تكون نفسك , لا ما احنا هنكون نفسنا مع بعض , طب انت تعرفها كويس ولا لا , طبعا دي زميلتي من سنة أولى , طيب حددلنا معاد عشان نتعرف على أهلها وبعدين نبقا نشوف الموضوع دا , المعاد جاهز بكرة على العشا , دا انت مظبط نفسك ماشي ربنا يوفقك يابني .

(اليوم المنتظر )

طخ طخ طخ ايه دا ايه الإزعاج دا الساعة دلوقتي 8 الصبح الواحد ميعرفش ينام لما أطلع أشوف في ايه , أزيك يا محمد بيه معلش صحيتك من النوم ( أم بدوي الشغالة ) أصل كنت بنضف السجادة . لا لا ولاحاجة روحي أعمليلي كوباية قهوة , حاضر يا بيه حاجة تاني , لا شكرا . أم بدوي أم بدوي , نعم .
أنت كنت بتنضفي أنهردة ليه مش معادك التلات , اه يا بيه بس الحجة جايلها ضيوف أنهردة على العشا , أيه ضيوف يا نهار أبيض , في ايه يا بيه , روحي أعمليلي بدل كوباية القهوة جردل قهوة .
بابا بابا , أيوة يابني صوتك عالي ليه , الحأني ماما جايلها ضيوف على العشا.
أزاي هو انت يابني مقلتلهاش , لا انا كنت فاكر حضرتك هتقولها . لا مقولتش طيب سيب الموضوع دا عليا . بس بسرعة الله يخليك يا بابا .
فضلت رايح جي رايح جي في الطورئة بتاعتنا أصلها كانت طويلة جدا ومع كل خطوة قلبي يدق 100 دقة , باب الأوضة أتفتح وبابا طلع وبصلي بنظرة حزن وقال : للأسف مش هينفع يابني , انا كنت عارف يا بابا , وكمل كلامه الناس ييجوا النهاردة لأننا هنروح معاك , طبعا وشي أتحول من وضعية السكون لوضعية رقصني يا معلم ........

الفصل السابع : دعوة على العشاء
بيــــب بيـــــــب بيـــب يلا يا ماما أتأخرنا , أعمل ايه مش كنت بظبط نفسي ولا أروح مبهدلة طب يلا أركبي .
تفتكر يابابا هيكونوا ناس كويسين ولا بتوع فلوس وعصر العريس , البنت بتاعت فلوس , لا يا بابا , معاها عربية أخر موديل , لا يا بابا , محجبة وماشيه على دينها , اه , يبقى إن شاء الله أهلها ناس كويسين .
اتفضلو وصلنا . كنت أنا أول الواصلين لباب الشقة ودوست على الجرس وكأني بحط صباعي في عين واحد من الخوف .
الباب فتح وكانت هيا اللي فتحت الباب , أزيك يا عمو أزيك يا طنط أتفضلو أتفضلو.
أول ما دخلنا لقيت حمايا داخل على بابا وكإنو يعرفو من زمان , أهلن أهلن يا مهاب نورتنا , بابا برضوا دخل على حمايا بوس وأحضان , بصلي بابا وقالي مش تقولي يا بني أنو عمك رمزي , ليه هو انتو تعرفو بعض , رد حمايا يبني دا أحنا كنا زمايل في المعهد مع بعض وعارفين بعض عز المعرفة . طبعا انا و رانيا بصصينا لبعض وأغم علينا في وقت واحد ولما فوقنا قالولنا أنهردة الفتحه والإسبوع الجاي الخطوبة ولما تخلصو كلية وتقفوا على رجليكو نبقا نجوزكو لبعض .
من ساعت ما شفت البنت دي وأنا مرتحلها كدة لله في لله من غير سبب .


الفصل الثامن : أزمة قلبية

ايه بتقول ايه بباك يعرف بباها , تصور يا كريم , يا صدفك يا حنف طب بقولك ايه البنت دي عندها أخت , أه اشمعنا , عندها كام سنة , أصغر مننا بسنة , طب ما تعرفني عليها , ليه , عشان أحنا أخوات لازم ناخد أتنين أخوات عشان نضمن إن إحنا مش هنفترق . طب يا سيدي هشوف .
خلينا نروح نشوف النتايج يا كريم لحسن دا أنا على نار .
بعد ساعة .
الوو نجحنا يا رانيا نجحنا أنا ممتاز وإنت ممتاز برضوا ايه بتقولي ايه مستشفى مستشفى ايه طيب أنا جاي في السكة . يا رب استر يا رب

وصلت المستشفى وأنا قلقان جدا ولقيت رانيا في أخر الطرقة بتعيط جريت عليها وقلتلها مالو عمي مالو , ردت وهي مش مسكة نفسها من العياط جاتلو أزمة قلبية , لا حول ولا قوة إلا بالله أمتى حصل الكلام دا , من ساعة تقريبا , طيب انا هشوف وطمنيك , الله يخليك يا محمد بسرعة مش عارفة أعمل إيه , إهدي يا حابيبتي إهدي روحي أقعدي لغاية ما أشوف أيه الحكاية .
طلع أبو رانيا من المستشفى بعد أسبوع وعملنا حفلة كبيرة بمناسبة طلوع أبو رانيا بالسلامة وتخرجنا كلنا , وإنتهزت الحفلة دي وعرضت عليهم كريم لأخت رانيا وبرضوا أهلها وفقوا عليه ..............


الفصل التاسع : عالمستشفى عدل

أه أه محمد اصحا الحقني انا تعبانه أوي , في أيه يا رانيا مالك , انا تعبانة أوي وحاسة إني عايزة أرجع , طيب انا هاخدك عالدكتور .
طمني يا دكتور مالها رانيا , مبروك يا أستاذ محمد مراتك حامل في التاني
, وشي ضرب الوان من الفرحة ومستنيتش كلمت كل اللي أعرفهم . بس جيت أتكلم في بيت رانيا محدش بيرد إتصلت على موبايل أبو رانيا مردش عليا
قولت يبقا لازم أروح أطمن عليه بنفسي .......

الفصل العاشر : رانيا مالهاش غيري

إنهردا عزا بابا رانيا اللي مات بسبب القلب وطبعا رانيا وأختها بيعيطوا من أمبارح ومش قدرين يمسكوا نفسهم . رجعت أنا وكريم على بيتي و رانيا وأختها قعدوا في بيت أبوهم كام يوم عقبال ما يهدو وبعدين نرجعهم معانا , قررت انا وكريم نعتمد على نفسنا في الطبيخ نعمل أحنا الاكل بنفسنا ونخدهولهوم .

بعد أسبوعين
أخدت أجازة من الشغل أسبوع عشان أخد رانيا وكريم ياخد مراتو ونروح الساحل نغيرلهم جو وصلنا الساحل السما كانت صفيا وصوت البحر بيدخل في الودان يطربها والدنيا هديا وكلو تمام . أدرنا نخليهم يطلعوا من جو الحزن وفسحناهم أحلى فسحة . كنا نازلين في فندق 5 نجوم كان اخريوم لينا في الساحل بعد كدة هنرجع اليوم اللي بعدو على القاهرة عشان شغلنا .
رانيا: أصحيك الساعة كام عشان نمشي , قلتلها 11 الصبح وحطيت راسي على المخدة روحت في النوم بعد شويه حسيت أني بتخنق ومش قادر أخد نفسي صحيت لقيت الأوضة بتتحرق والدنيا ولعة حولت اصحي رانيا مصحيتش لانها فقدت الوعي شلتها على كتفي وأنا بدعي ربنا يطلعنا من الأوضة بسلام ومن حسن حظي إن النار مكانيتش وصلت للباب فا طلعنا من الأوضة ونقلنا رانيا المستشفى والدكتور طمني عليها وعلى البيبي.............

الفصل الحداشر : ولي العهد

طبعا بعد ما جا أبني كريم ملا عليا انا وامه الحياة وفعلا زي ما بابا بيقول الخلفة مسؤولية وانا إن شاء الله قدها و قدود طبعا الولد طلع عيني لغاية ما ربيتو وعلمتو بس أنا كنت أرفض نظام الضرب أو الإكراه كنت دايما أستعمل حيلي الذكية عشان أخليه يعمل اللي أنا عايزه من غير ما يعرف لأن كل ما دللت الطفل كل ما كان خاتم في صباعك وميحرجكش في أي حتة وفي نفس الوقت مكنتش سايب الزمام لا كنت مربيه على الأخلاق الفاضلة وبدون أي نوع من أنواع العنف كلو كان تحفيز وتشجيع وقدوة . الولد أتعلق أوي ببنت خالته اللي هيا بنت كريم ربناهم وكبرناهم سوا دلوقتي هما عندهم 5 سنين .

الفصل الإتناشر : حاجة نفسي أعملها من زمان

انا دخلت في قصت رانيا وتعمقت عشان أخلصها دلوقتي نرجع تاني لورا أوي أيام ما كان عندي 17 سنه انا روحت لأبويا اللي هو بابا أحمد بقالي كتير مروحتش هناك عشان مش عايز أشوفوه لأسباب حصلت مابينا قبلها بسنة بس عمي بعد كدة بررلي الموقف لما شفته . , خبطت الباب , مين , انا محمد ,الباب إتفتح, أزيك يا بابا كويس , الحمد لله يابني , بيكلمني كأننا كنا سوا من ساعة مش ملهوف عليا , دخلت البيت وقعدت على الكنبة وفكرت في دماغي أقول( طيب انا انهردة جي أتكلم معاك في موضوع , إتفضل , إنت من يوم ما سبتني وانت مبتسألش عني وانا باجي اسأل عليك كل فترة عارف ليه , ليه , عشان أنا عارف إن مليش جنة غير لما أرضي أبويا وأرضي أمي ) ( مش قادر أكمل لان دا محصلش لسه فامش قادر أعرف ردود الفعل هتكون إزاي بس في يوم من الأيام هتحصل المقابلة دي ) لقيتو بيقولي على فكرة عمك وعمتك جايين دلوقتي قلتلو كويس دا انا نفسي أشوف( مكملتش كلمة أشوفهوم إلا والباب خببط )
روحت على الباب وقلت مين لقيت صوت راجل من بره بيقول إفتح يا حمادة أنا عمك , فتحت الباب لقيت راجل وست داخلين عليا وبيسلمو عليا ومعاهم ناس كتير أنا أول مرة أشوف عمي وعمتي سلمت عليهم وبدأ بابا يعرفني بيهم : ده عمك مصطفى ودي عمتك دلال وده كمال ابن عمك وهيتجوز قريب ودي رانيا بنت عمك متجوزة ومخلفة بنتين ودي مريم بنت عمتك أكبر منك بسنتين .



الفصل الأخير



عجزت أن أضع أكثر من ذلك فأنا شاب في عمر 17 سنة وكل ما كتبته هو مزج بين شخصيات في حياتي وخطط في جدول أعمالي وقصص حدثت وقصص من نسج خيالي
فهل سأستطيع تغيير العالم أم سيغيرني العالم معه
17سنة إكتشفت فيها أن (( الحياة إبداع والإبداع من المبدع والمبدع أبدع في صنعنا فلما نسيء إستخدام الإبداع الذي أبدعه الخالق فينا ))

الحياة خطوة والخطوة أمل والأمل لا يأتي من فراغ

إنتظروني في مواضيع البلوج