ويلكم تو ايجبت 2

أنا مشترك مع فريق مجددون (صناع الحياة مدينة نصر ) فا بننزل مشروع اسمو انسان لمكافحة التسرب في التعليم .
نزلت أنهردة معاهم بحث حالة لمنطقة من العشوائيات اللي فيها عشش .
أولا أن اتعلمت حجات كتيير من صناع انهردة يمكن من أهمها إني حسيت بالناس الفقراء وعرفت إن العشوائيات بتاعت الأفلام دي كدب وأي كلام ولا تمس بالواقع بأي صلة , اتعلمت أركب مواصلات في بلدي , اتعلمت اتكلم مع الناس وأقنعهم إزاي , وحجااااات تانية كتير .
نزلت من الساعة 11 الصبح رحت على الجمعية ومن هناك رحت مع التيم بتاعي بالمكروباص على حتة اسمها المساكن وبعدين من هناك رحنا جسر السويس عند حديقة اسمها بدر , دخلنا المنطقة المطلوبة في البحث ولفيناها عشة عشة طبعا ناس مش عايشة أنا قلت الحمد لله يا رب على نعمتك بصراحة حاجة صعبة جدا . جت في دماغي مقارنات كتير من ضمنها ناس عايشة عشان تصرف وناس بتصرف عشان تعيش ناس بتفطر فول وجبنة وناس بتفطر عيش مش مدعم ناس بتشرب كبتشينو وناس بتشرب مية ملوثة ناس بتركب عربية وناس اخرها تدفع أجرة مكروباص ناس بتلبس كل يوم وناس مش عارفة تدفا عند النوم ناس بتعيط عشان الحب وناس بتعيط من الذل ناس بتدرس في جامعة امريكية وناس اخرها محو أمية ناس بتتعب عشان القرش وناس بتصرف بالفيزا كرت ناس وناس وناس الحمد لله على كل حال وربنا يفك كربهم ويزيل حزنهم ويمحي دمعتهم امين امين امين .



ملحوووظة : رجعت الساعة 4 ونص البيت ومكنتش شايف قدامي وعلى فكرة أي حد عايز يجي مجددون يتفضل احنا ورا قويدر اللي في عباس العقاد .

ملحوظة كمان مش هكتب كدة تاني هرجع لإسلوبي القديم

ويلكم تو ايجبت 1

وصلت إلى بلدي الحبيب المليء بالزبيب والدقيق والذرة وإذ بأولاد خالتي مستنيني في مطار القاهرة العظمى روحت معاهم على مدينة نصر سيتي بيتنا يعني من الأخر وإديلو نووم يا معلم مقدرتش أستحمل لأن بقالي 3 أيام مبنمش عدل , صحيت وفتحت عنيا على نور الصبح الضارب في نني عنيا الإتنين وبدأت الطقوس المصرية الطبيعية وهي تجمع الأهل على طرابيزة وحدة على الفطار ويكون الفطار الطبيعي فووووول وبيييييض وجبنة بعد ما كنت بفطر تونة وسوسيس وسعات ساندوتش جبنة ولانشون .

الحياة هنا في مصر مختلفة تماما انت هنا بتعيش عشان انهردة وبس مبتبصش قدامك أما هناك برتب للحاجة قبلها بفترة .الدنيا في بلدنا الحبيبة زحمة جدا وده نظرا لزيادة عدد السكان كل 5 ثواني عيل .بس لازم أتعايش مع المحيط والجو اللي أتفرض عليا وخصوصا إني هعيش هنا على طول بقا وأهلي هيرجعو السعودية .عايز تمشي هنا بسرعة وتخلص أمورك تحط مع أي حاجة عايزها جنيه تلاتة بالكتير .بقالي في مصر شهر بدأت أعتمد فيه على نفسي بشكل كبير وبقيت أروح وأجي طبعا لسة محفظتش الشوارع ولا بقيت أعرف أركب ميكروباصات بس أهو ماشي حالي .

بس أكتر فرق حسيتو بين هنا وهناك هما الشباب أنا عرفت الشاب في مصر قليل لما يصلي ليه لأن أصلا بيسمع الأذان بالعافية والبنات بقا طالعينلي بموضة جديدة اللي هيا بدي مش عارف ايه تلبس كله محزق وملزق ومبين كل تفاصيل جسمها المملة وبعدين بسم الله ما شاء الله محجبة على ايه بقا. عموما مليش دعوة يولعو لحسن تكونو فاكرين إني متشدد لا لا لا أنا منفتح لأبعد الحدود .

مشيت في الشوارع وبعدين الحواري وكنت كل ما أعدي في حارة أعيط وأقول ليه كدة يا ربي ليه الناس دي عايشة كدا يا رب أرزقهم وأفتح عليهم من عندك.

رحت قدمت في التنسيق الحكومي بس النتيجة بعد اسبوعين وقدمت في الأكاديمية البحرية والله أعلم ايه اللي هيحصل بس اهم حاجة يا خوننا تدعولي من قلبكو.

وعلى رأي الأغنية الحياة حلوة بس نفهمها .

ليدي أند جينتل مان يللا بلا باي تابعو بقيت ويلكم تو ايجبت ...................................