1: هو اه والله هو ده
2: لا يا بني مش ممكن معقول !!
1: اه هو والله
2: يا بني التاني تحس ان هو راجل كبير مش ممكن يكون الشاب ده
1:لا هو عشان انا شفت صورته حتى أسأل معتز كدة
2: معتز هو ده محمد حنفي ؟؟!!
3:اه هو
1: شفت
محمد محمد احنا بنحبك اوي يا ميدووووو
( وإذ فجأة ينقلب المطار رأسا على عقب عندما يكتشف الركاب ان هذا هو الكاتب محمد حنفي كان معكم مراسل قناة الجزيرة من قلب مطار القاهرة الدولي )
بودي جارد 1 : استاذ محمد اتفضل احنا امنالك الطريق
( ينزل محمد حنفي من العربية الرولز رويز )
بودي جارد 2 : ابعد يابني انت وهو من هنا استاذ محمد مش عايز حد يصوره لو سمحتو ابعدو بالزوق .
معجب 1: الله يخليك صورة صورة واحدة بس
بودي جارد 2 : لا مستحيل
محمد حنفي : سيبه سيبه خليه يتصور معايا
معجب 2 : باسبورك
محمد حنفي : نعم
معجب 2 : الباسبور يابني
محمد حنفي : انت بتكلمني انا
طاااااااااااااااااااااااااااااااااااااااااااااااااااااااخ طاااااااااااااااااااااااااااااااااااخ
( وده صوت القلم اللي خدتو على قفايا لما أكتشفت ان انا كنت بحلم والناس اللي حواليا كلهم مسافرين والدنيا زحمة والمعجب ده كان الظابط وحاجة فل )
وقد كان كل هذا بسبب ان دي أول مرة اسافر فيها لوحدي يعني عارف يعني ايه يعني من غير مامي (( مامي )) اه والله مامي انتو مش مصدقين انا طول عمري كنت بسافر مع ماما الا المرة دي انا رايحلها السعودية .
هذا لا يعني اني ننوس عين ماما لا انا جدع انا جدع أوي كمان اه لحسن حد يفهم كدة ولا كدة .
دخلت على الظابط وقلتله انا اسف يا باشا وعديت والحمد لله ومحدش ركز معايا ولا قالي كنت سرحان في ايه , دخلت جوا المطار وانا فارد جسمي كدة وكأني لم أخذ قلم على قفايا المعلم بالأحمر لقيت راجل عجوز اوي وبيسألني هو الطيارة منين يابني قلتله يا حج انت رايح فين؟ قلي : انا انا ! أنا !!!!! ممممم ! أنا تقريبا كدة رايح كوالالمبور
أنا : نعم وانت ايه اللي يوديك هناك
الحج : اصل جالي عقد عمل في الخليج
أنا : طب ومال الخليج بكوالالمبور
الحج : هيغور هو مين اللي هيغور
أنا : بقلك كوالالمبور يا حج
الحج : حد هو في حد هنا غيري
أنا : لا انا وانت والركاب
الحج : حجاج هما رايحين يحجو السنادي
أنا : ياااا لهوي باين اني مش هخلص الليلة دي
الحج : اه الليلة دي دي أغنية لعمرو دياب
أنا : لا حول ولا قوة الا بالله وتقلي رايح الخليج
الحج : بهيج هو جه ؟
أنا : لا
الحج طب لما يجي قله حفيدك بيسلم عليك
أنا : ( طب والله لأشتغلك في الأزرق )
الحج : الأزرق دا لوني المفضل
أنا : معضل هو مين اللي معضل
الحج : الصندل لا انا نسيته
أنا : ناديته هو مين اللي ناديته
( تن تن تن تن على الركاب المتوجهون إلى جدة الذهاب لمخرج رقم 6 استعدادا لصعود الطائرة )
أنا : سلام سلام يا حج انا طيارتي هتمشي وخلي جدك بهيج يجي يسليك بدل ما أنت متنيل كدة
جريت عالباب وأنا بلتفت وببص على الحج عشان اشوف مين حواليه وهيساعده لقيته أختفى تلاقيه مشي وللا حد خده مش مهم .
جهزت جواز السفر والتذاكر وادتهم للكمسري !!!.... قصدي للظابط اللي على الباب شافهم وطلعني عالطيارة , ركبت الطيارة وقعدت مكاني وغمضت عيني وبدأت أفتكر الأيام الحلوة اللي قضتها في مصر والأيام الحلوة اللي قضتها في السعودية , وقلبي عمال يدق فتحت عيني بعد ما خلصت ذكريات ولقيت الطيارة بتختفي تختفي ويظهر سقف أوضة والكرسي بتاع الطيارة بدأ ينام بيا لغاية ما اتقلب سرير .
على فكرة أنا لسة في بيتنا وبتخيل ايه اللي هيحصل بكرة حتى بالأمارة أنا نايم عالسرير وماسك اللابتوب وبكتب البوست ده .
ادعولي أوصل بالسلامة يا جدعان .
كان معكم حنفيكو الروش طحن آخر حاجة وهو على سريره المتواجد في عزبة الحج ابراهيم وهو بيقلكو هو جامد اوي ومفيهوش حاجة وكل الأشاعات اللي طلعت عليه دي كدب كدب كدب وباطل من ام شحيبر النتن .
ليست هناك تعليقات:
إرسال تعليق