الأحد، 18 يوليو 2010

خليك متأكد



اهلا وسهلا اهلا اهلا ايه يا جماعة فاكرين فاكرين انا زي دلوقتي كنت فين : انا كنت لسة جي مصر وبدور على كلية ادخلها
وجي اقول كلمة واحدة يا بشر خليك متأكد !!!؟؟!؟

خليك متأكد يا بني آدم ياللي جي من برة ان بلدك دي جميلة من جوة ومن برة يعني متقلقش من حاجة خالص بس عايز انبهك لشوية حاجات اخوك اتصدم فيها من ساعت ما جه وبصراحة العملية مش ناقصة صدمات :)

خليك متأكد انك لما توصل وتنزل من الطيارة هتكح بل خليك واثق انك لما تنزل بيك الطيارة هيتقلك كلمة حلوة اوي ويلكم تو ايجبت
كلمة ويلكم تو ايجبت دي بوابة جهنم عليك يا روح ... ( انا مش بخوفك بس بنبهك ) خليك واثق انك هتقف في الجوازات بتاعت المطار ساعة ونص وده طبيعي جدا لو مكنش اكتر خليك متيقن انك لما تاخد شنطتك من السير هتكون اما مفتوحة او مكسورة او لو معاك جركن مية زمزم هيتسرق .

خليك متأكد انك لما تطلع من باب المطار هتلاقي صهد وتراب غريب مع انك لو جي من الخليج فمفروض ان مصر اقل حرارة بس محدش قلك انها اقل غبارة خليك واثق انك لو ركبت تكسي من المطار هيتنصب عليك حتى لو خليتو يوصلك بس لبااب المطار من برة خليك متيقن ان التكس هيقعد يحكيلك قصة العيال ومراته اللي خانته او قصة الراجل اللي سرقه او قصة الكوبري اللي وقع على المشاه وهو لسة اصلا متبناش .

خليك متأكد يا ضنايا ان لو معندكش شقة وناوي تأجر يبقى مش هيفرق مالك الشقة عن سواق التكسي كتير برضو هينصب عليك أو هيحكيلك عن الشقة الفاضية اللي في العمارة اللي جمبهم وان صحابها عايزين يخلصو منها عشان جريمة القتل اللي حصلت فيه ( عشان سعادتك متفكرش تاخد غير شقته ) خليك واثق ان الشقة هتكون مليانة نمل وخصوصا في الحمام ( مش عارف والله ليه ) خليك متيقن انك لو جي من الخليج او امريكا او اوروبا هتدفع مصاريف صيانة ( المصعد ) كلها من غير ما حد يشاركك ( ما انت الاهبل اللي جي من برة ومعاه فلووووس قد كدة ) .

خليك متأكد انك لو طالب جي تدخل جامعة ومجموعك 99 % هيوصل بعد المعادلة ل 80 % وده عشان نفس النقطة اللي فاتت ( ما انت ابوك حرامي في الخليج ولازم تدخل جامعة خاصة ) خليك واثق انك لما تدخل الجامعة الخاصة هتتعرف على شلة زيك بس بايظة شوية بسيطة مش كتير يعني مختلفين عنك انهم بيشربو سجاير وبيرقصو في ديسكو وبيشربو زفت والعملية بابا عادي ماما عادي ( طبعا مش في كل مكان وانا محصلش معايا كدة الحمد لله ) هيتعزم عليك بكل حاجة من اللي قلتلك عليهم دوول عادي جدا ويا وافقت وبقيت راجل زيهم او موافقتش وبقيت عيل ومش على مزاجهم وهيستلموك يا معلم خليك متيقن انك لو حبتك بنت فا غالبا هتكون بتحبك علشان النقطة اللي لتالت مرة بعيدها ( عشان انت ابوك راجل مليونير في الخليج وعندو عربيات كتير وطيارة خاصة كمان ) ( طبعا برضو ده مش مقياس ممكن يحصل وممكن لا بس ده غالبا الواقع ) .

خليك متأكد انك هتركب تاكسي في مصر لمدة 3 اشهر وهينصبو عليك كتييير اوي لغاية ما تتعلم تركب مواصلات خليك واثق انك هتركب الميكروباص هتنزل عندك طرش وممكن تفقد السمع لمدة اسبوع وده عشان البيه مش عارف هو هو ولا هو مش هو ( مع احترامي للمطرب القدير اللي غنا اغنية انا مش انا أو المطرب الكبير العبقري الفنان اللي ضرب حجرين على الشيشة ) خليك متيقن أنك لما نزل من الاوتوبيس هتتكفي على وشك أو هتقع على حد في الشارع أو هتيجي عربية من وراك تشيلك ( اصل سعادة البيه السواق مش فاضي ينزلك او لو نزلك بيرح دايس بنزين بعزم ما فيه وانت على آخر سلمة .

خليك متأكد انك هتعدي الشوارع الرئسية في اول شهرين في نص ساعة وتقعد لمدة سنة يقل الوقت لغاية ما تعدي الشارع في 3 ثواني ونص وده على خلاف الشعب المصري اللي بيعدي في 3 ثواني من غير نص وصدقني هيفرق معاك النص ده كتير لأنك في مرة ممكن تتشال عشان انت مختلف عن باق البشر ( ما انت ايه اللي جابك استحمل بقى واقفل بقك ) خليك واثق انك مينفعش ابدا تعدي الشارع من قدام ست سايقة او اوتوبيس او ميكروباص او اي عربية نقل ( عشان سواقة الستات هنا احسم من الرجالة بكير واكثر دقة عشان كدة من حق كل ست.......هكمل في النقطة اللي بعدها ) خليك متيقن انك لما تيجي تدخل شارع جانبي ووقفت مدة طويلة من الزحمة من غير سبب يبقى اعرف ان في واحدة ست بتركن العربية ( .... من حق كل ست تركن العربية في نص الشارع عشان تنزل تقيس الفستان عند الترزي مش احسن ما يطلع ضيق وترجعله تاني ).

خليك متأكد وواثق ومتيقن وفاهم وعارف انك مصري وابن مصري ومصرية وعايش في مصر ولو في حد من اللي انا قلتهم مش مصري او انت معشتش في مصر يبقى انت كدة فيك حاجة غلط ولازم تتعالج والعلاج انك تعيش في مصر لمدة سنة هتتغير فيك حاجات كتييييييييييييييير اوي مكنتش متوقع تغيرها وهتشوف اللي عمرك ما شفته .
وبرضو هعيد كلامي كل شوية ( بحبها بحلوها ومرها وهفضل على طول احبها دي بلدي يا بشر ولازم اكون واحد من ولادها واهلها )

((((( خليك متأكد )))))

الجمعة، 2 يوليو 2010

حميني انهردة ووسخني بكرة


عنوان واضح وصريح واللي مش فاهمه بلاش فيا يطيح

أنا انهردة صحيت على صوتها (جزء من اغنية لتامر بس متستعجلش) صحيت على صوت مين على صوت تيتا : محمد محمد , ايوة يا تيتا صباح الخير , المية قاطعة ( بووووووووووووووم) عاااااااااااااااااااااااااااااااااا عاااااااااااااااااااااااااااااااااااااااا عااااااااااااااااااااااااااااااااااا انفجرت هذه العبارة في وجهي كالقنبلة , لييييه ؟ لأسباب كتير
أولا أولا انا هنفجر وعايز أدخل الحمام
ثانيا بقى ودي الأهم انهردة الجمعية وباقي ساعة عالصلاة , وكمعلومة دي مش أول مرة يحصل كدة لا دي بقالها اسبوعين على الحال ده وتقريبا دي الطريقة الجديدة عشان منصليش الجمعة يقطعو علينا المية واااااااااااااااااااااو وقال ايه أصل بيعملو حاجة في المواسير كاتهم بواسير لما تشلهم طب وأنا مالي أنا مالي عاااااااااااااااااااااااااا عايز أستحمى يا بشر مع اني استحميت امبارح بس برضو أنا بعشق الحمووم وخصوصا يوم الجمعة , وأحلى حاجة أن غالبا المية بتيجي على بداية الخطبة يقوم الواحد عقبال ما يدخل الحمام فيها نص ساعة ( هووووب طار نص الخطبة يا جماعة) وعقبال ما أوصل المسجد ( هوب طار ربع منها ) يبقى باقي ايييييه باقي إن أنا اسمع الدعاء اللي في الآخر وأصلي وبس , حلاوة هتقلي طب والناس اللي في المسجد دي راحت بدري ازاي هقلك بص أولا المية مقطوعة عن الشارع كله فا يا إما دوول من شارع تاني او منطقة تانية يا إما دوول صحييين من الفجر ومستحميين وطبعا انا الفجر صليته ونمت يا إما دوول مبيتوضووش ومقضينها بالعبط كدة ومش مشكلة معاهم .

طب والحل ايه الحل ايه يا أبو حنفي والله ما انا عارف بس غالبا هجيب ازازة مية صحة وهتوضا بيها وانزل.

شكرا ليك وشرفت يا باشا

.

كلمات مفتاحية

مدونة بلوج تدوين مصر مصريين شاب شباب كائن بلوجات بلوج بلوجر بلوجز تدوين عربي أفتخر أنا هنا أضحك أدب ساخر أدب عربي مصري القاهرة العرب الناس ادب كليات مغتربين مغترب في الخارج مسلم جديد جديدة طريقة

blog bloger blogs modawna tadween lol egypt egyptian cool new